ავტორი: Nanuki Kavtuashvili

ზელენსკის თქმით, უკრაინელებისნაირი ერთგული ადამიანების ყოლა ბედნიერებაა და მათი წინააღმდეგობა წარმატების სიმბოლოა. პრეზიდენტი უკრაინელებს მოუწოდებს , რომ გაუძლონ იქამდე, სანამ რუსებს არ გაყრიან, იბრძოლონ ყველგან და ყველაფრით საკუთარი მიწისა და ოჯახებისთვის და ყველა ერთად, მთელი უკრაინა, დაამარცხებს დამპყრობლებს.

“უკრაინის არცერთ ნაწილში არ მინდა, ადამიანებმა იფიქრონ, რომ მათი ქვეყანა მათზე არ ფიქრობს, ან არ ახსოვს. ყველა ჯერზე, როდესაც გტკივათ, გიმძიმთ, როცა ყველაფრის წინააღმდეგ მიდიხართ, გევედრებით, იცოდეთ, რომ ამ დროს ჩვენ თქვენზე ვფიქრობთ და გული გვისკდება, რადგან ადგილზე ვერ ვართ. გთხოვთ, გაუძელით იქამდე, სანამ უცხოტომელებს არ გავყრით. თქვენი წინააღმდეგობა წარმატების სიმბოლოა. ბედნიერებაა, რომ თქვენნაირი ადამიანები გვყავს. ჩვენ ყველა უკრაინელები ვართ,“- ამბობს ზელენსკი

რაგბის კავშირმა სოციალურ ქსელში დაწერა, რომ საქართველოს რაგბის კავშირი უკრაინაში ადგილობრივი მოსახლეობის მხარდასაჭერად ჰუმანიტარულ დახმარებას აგროვებს.

„უკრაინაში ადგილობრივი მოსახლების მხარდასაჭერად, ქართული რაგბის კლუბებისა და გულშემატკივრების სახელით გროვდება ჰუმანიტარული დახმარება. საჭიროებების სია, ვეტერანმა ბორჯღალოსანმა, დიმიტრი ბასიალაიამ მოგვაწოდა, რომელიც ახლა უკრაინაშია და მეგობრებთან ერთად ზრუნავს ადგილობრივ მოსახლეობაზე და უწევს ამ ყველაფერს ორგანიზებას. დახმარების სურვილის შემთხვევაში, სიაში ჩამოთვლილი საჭიროებები, 31 მარტის ჩათვლის შეგიძლიათ მიიტანოთ შემდეგ ლოკაციებზე: შევარდენის სანაკრებო ბაზა – თბილისი, ბერი გაბრიელ სალოსის 112; აია არენა – ქუთაისი, კონსტანტინე გამსახურდიას 65; ბათუმის რაგბის არენა – ბათუმი, გოგლა ლეონიძის 2“, – წერია განცხადებაში.

უკრაინის პრეზიდენტმა, ზელენსკიმ ექსკლუზიურ ინტერვიუში განაცხადა, რომ უკრაინა რუსეთს ულტიმატუმებს არ შეუსრულებს და მთავრობა და ხალხი ერთიანია.

„ჩვენ წაგვიყენეს ულტიმატუმი, რამდენიმე პუნქტი- თქვენ შეასრულებთ ამას და შემდეგ ჩვენ დავასრულებთ ომს. ეს არასწორია, ამას არსაით მივყავართ. ეს საკითხი მხოლოდ მე არ მეხება, ის ეხება იმ ფაქტს, რომ მთავრობა და ხალხი ერთიანია. ამის ულტიმატუმით გაკეთება შეუძლებელია. ამას ფიზიკურად ვერ ვიზამთ. ჩვენ დავკარგეთ ხალხი. როგორ შეგვიძლია ამის გაკეთება? ჩვენ ყველა უნდა გავნადგურდეთ, მაშინ იქნება მათი ულტიმატუმი ავტომატურად შესრულებული. მაგალითად, მოგვეცით ხარკოვი, მარიუპოლი, კიევი. ვერც ხარკოვის, ვერც მარიუპოლისა და ვერც კიევის მცხოვრებლები და ვერც პრეზიდენტი ამას ვერ იზამს. ჩვენ ვხედავთ ოკუპირებულ ქალაქებში, მელიტოპოლში, ბერდიანსკში, როდესაც ისინი შედიან, ხალხი არ ნებდება. ისინი თავიანთ დროშებს აღმართავენ და ხალხი მათ ხსნის. მათ ადამიანი მოკლეს, თუმცა ხალხი ღამით მაინც მივიდა და დროშა ჩამოხსნა. რა გსურთ, ყველას განადგურება? სწორედ ამიტომ ვამბობ, ულტიმატუმის შესრულება მხოლოდ მაშინ შეიძლება, თუ ჩვენ არ ვიარსებებთ“, – განაცხადა ზელენსკიმ.

უკრაინული მხარის წარმომადგენელმა, დავით არახამიამ განაცხადა, რომ უკრაინა-რუსეთს შორის მოლაპარაკებების მე-5 რაუნდი გაიმართა.

მისი თქმით, ოფიციალური დელეგაციების შეხვედრა საათ-ნახევრის განმავლობაში, ონლაინ რეჟიმში მიმდინარეობდა. მოლაპარაკებების შესახებ დამატებითი დეტალები ცნობილი არ არის.

“შეხვედრა ონლაინ უკვე შედგა. საათ-ნახევრი იყო ოფიციალური შეხვედრა, შემდეგ გაგრძელდა სამუშაო ჯგუფების მუშაობა. დღეს მთელი დღე ვმუშაობთ”, – ამბობს არახამია.

კერძო სექტორის ნაწილი, რუსეთ-უკრაინის ომის გამო დღგ-სა და საშემოსავლო გადასახადების დროებით შემცირებას ითხოვს. კომიტეტის თავმჯდომარე დავით სონღულაშვილი კი მათ პასუხობს, რომ საქართველოში გადასახადები ისედაც დაბალია, მოკლევადიანი ინფლაციის გამო კი , ამ პოლიტიკის გადახედვა საჭირო არ არის.

“ფასების ზრდა გარდაუვალია არამხოლოდ საქართველოში, არამედ რეგიონში და მსოფლიო ეკონომიკაში. ეს არის მოკლევადიანი, საშუალოვადიან და გრძელვადიან პერიოდში კი შესაძლებელია მისი მეტ-ნაკლებად დასტაბილურება. საგადასახადო კუთხით საქართველო არის იმ 10 ქვეყანას შორის, სადაც დაბალია გადასახადები. აქედან გამომდინარე (გადასახადების შემცირებამ) არ მგონია, რომ არსებითი გავლენა მოახდინოს ეკონომიკის აღდგენის დაჩაქრებაზე”,- განაცხადა კომიტეტის თავმდჯომარემ

გერმანული გამოცემა Tagesspiegel-ის ცნობით, გერმანია გაზის შეძენას რუსეთის ნაცვლად ყატარისგან გეგმავს, ამიტომაც გერმანიის ფედერაციული რესპუბლიკის ეკონომიკის მინისტრი რობერტ ხაბეკი კვირას დოჰას ესტუმრა.

ეკონომიკის მინისტრმა ყატარის დედაქალაქ დოჰაში განაცხადა, რომ მიიღეს გადაწყვეტილება, გრძელვადიანი ენერგოთანამშრომლობის გაფორმების შესახებ და „ეს ნაბიჯი „უპუტინო“ გაზის ხანგრძლივ გზაზე “ გადასვლის მომასწავლებელია.

„წელს რუსული გაზი ჯერ კიდევ გვჭირდება, მაგრამ არა მომავალ წელს. ყველაფერი ასე იწყება, ამიტომ ვისაც ყურები აქვს, უნდა მოგვისმინოს“ – ასე მიმართა რობერტ ხაბეკმა ვლადიმერ პუტინს.

კომპანიებმა ყატარის მხარესთან ხელშეკრულების გაფორმების საკითხზე მოლაპარაკებები უკვე დაიწყეს.

უკრაინის პრეზიდენტმა ისრაელი უმოქმედობაში ამხილა. ზელენსკიმ ებრაელების დევნა და უკრაინელების წინააღმდეგ რუსეთის მიერ წარმოებული ომი ერთმანეთს შეადარა.

„ჩვენ სხვადასხვა სახელმწიფოში და სრულიად განსხვავებულ პირობებში ვართ, მაგრამ ერთი საფრთხე გვაქვს – ერის, სახელმწიფოს, კულტურისა და სახელის ტოტალური განადგურებაც კი.

მინდა 24 თებერვლის შესახებ დაფიქრდეთ, როდესაც უკრაინა რუსეთში შეიჭრა. ეს დღე ისტორიაში ორჯერ შევიდა და ორივეჯერ, როგორც ტრაგედია უკრაინელებისა და ებრაელებისთვის. 1920 წლის 24 თებერვალს გერმანული ნაციონალურ-სოციალისტური მუშათა პარტია შეიქმნა, პარტია, რომელმაც მილიონობით ადამიანის სიცოცხლე შეიწირა და სახელმწიფოები გაანადგურა. 102 წლის შემდეგ, ასევე 24 თებერვალს, უკრაინაში რუსეთის შეჭრის ბრძანება გაიცა. ამ შემოჭრამ ათასობით ადამიანის სიცოცხლე იმსხვერპლა, მილიონობით ადამიანი კი ლტოლვილად აქცია. ჩვენი ხალხი ახლა მთელ მსოფლიოშია მიმობნეული. ისევე ეძებენ უსაფრთხოებას, როგორც ოდესღაც თქვენ ეძებდით“, – განაცხადა ზელენსკიმ.

მან ისრაელის პარლამენტს მოუწოდა კრემლის განცხადებებს დაუკვირდნენ, რადგან რუსეთი იმ ტერმინებით საუბრობს, რომლებიც ნაცისტური გერმანიის განცხადებებში დომინირებდა.

„ამ განცხადებებში ის ტერმინები ისმის, რომელიც ნაცისტური გერმანიის განცხადებებში ისმოდა. მეორე მსოფლიო ომის დროს ამას „ებრაელების საკითხის საბოლოოდ გადაწყვეტას“ უწოდებდნენ. ახლა კი კრემლში ამას „უკრაინული საკითხის საბოლოოდ გადაწყვეტას“ ეძახიან. ისრაელელებო, თქვენ ნახეთ როგორ მოხვდა რუსული რაკეტები (ჰოლოკოსტის ძეგლს) ბაბიი იარს, სადაც ჰოლოკოსტის 100 ათასზე მეტი მსხვერპლია დაკრძალული. პირველივე დღეებში რუსული ჭურვები ქალაქ უმანს მოხვდა, რომელსაც ყოველწლიურად ათი ათასობით ებრაელი სტუმრობს“, – განაცხადა პრეზიდენტმა.

ზელენსკის თქმით ისრაელს მძლიერი ანტისარაკეტო თავდაცვის სისტემა და იარაღი აქვს, თუმცა უკრაინას ჯერაც არ დახმარებია და არც სანქციები აუმოქმედებია.

„მაგრამ შეგიძლიათ ამიხსნათ, დღემდე რატომ გვიწევს მთელ მსოფლიოს დახმარების თხოვნით მივმართოთ, თქვენც კი ვიზის მისაღებად მოგმართავთ? გულგრილობა კლავს, გათვლები ხშირად მცდარი შეიძლება იყოს, შუამავლობა კი მხოლოდ ქვეყნებს შორის შეიძლება და არა სიკეთესა და ბოროტებას შორის. თითოეულმა იცის, რომ თქვენი ანტისარაკეტო თავდაცვის სისტემა მძლავრია, თქვენი იარაღი ძლიერია, თქვენ თქვენი ერის ინტერესების დაცვა შეგიძლიათ და თქვენ დღეს უკრაინელების სიცოცხლის დაცვა შეგიძლიათ – უკრაინელი ებრაელების.

დაუსრულებლად შემიძლია დავსვა კითხვები – რატომ აქამდე არ მოგვეცით იარაღი, ან სანქციები რატომ არ აამოქმედეთ? მაგრამ ეს თქვენი გადასაწყვეტია. ახლა თქვენ არჩევანის საშუალება გაქვთ“, – მიმართა ისრაელელ პარლამენტარებს უკრაინის პრეზიდენტმა.

ბრიტანეთის პრემიერ-მინისტრმა, ბორის ჯონსონმა განაცხადა, რომ უკრაინას ნატო-სა და „დიდი შვიდეულის“ შეხვედრებზეც დაეხმარება.

მისი თქმით, დიდი ბრიტანეთი გააგრძელებს სამხედრო, ეკონომიკურ და დიპლომატიურ მხარდაჭერას და არაფერზე დაიხევს უკან, რათა ომი რაც შეიძლება სწრაფად დასრულდეს.

„ვესაუბრე პრეზიდენტ ზელენსკის დღის მეორე ნახევარში, რათა განმემარტა, თუ როგორ ვიმუშავებ უკრაინის ინტერესების წინსვლაზე ნატო-სა და „დიდი შვიდეულის“ შეხვედრებზე ამ კვირაში. დიდი ბრიტანეთი გააგრძელებს სამხედრო, ეკონომიკური და დიპლომატიური მხარდაჭერის გაზრდას ამ საშინელი კონფლიქტის დასასრულებლად“, – აღნიშნა ბორის ჯონსონმა.

უკრაინული მედიის ინფორმაციით, უკრაინაში რუსეთის შეჭრის შემდეგ, საცხოვრებელი ათმა მილიონმა ადამიანმა დატოვა.

„ვინც ომს აწარმოებს, მსოფლიოს ნებისმიერ წერტილში, მათ პასუხისმგებლობებს შორის არის ტანჯვა, რომელიც მიაყენეს სამოქალაქო პირებს, რომლებიც იძულებულნი არიან დატოვონ თავიანთი სახლები. უკრაინის ომი იმდენად დამანგრეველია, რომ 10 მილიონი ადამიანი გაიქცა – ან იძულებით გადაადგილდა ქვეყნის შიგნით, ან ლტოლვილია საზღვარგარეთ“, – განაცხადა გაერო-ს კომისარმა.

24 თებერვალს რუსეთმა უკრაინასთან ერთად ომი მთელ მსოფლიოს გამოუცხადა, უკრაინელების სიმამაცემ კი გეოპოლიტიკური ძვრები გამოიწვია და მსოფლიოში ახალი დღის წესრიგის შექმნა დაიწყო. ,,მსოფლიო ერთიანია უკრაინის მხარდასაჭერად და რუსეთი მძიმე ფასს გადაიხდის ამისთვის. პუტინი ომის დამნაშავეა,”- ბაიდენი.

მსოფლიო ერთიანია ისე, როგორც არასდროს. აშშ რუსეთს უპრეცენდენტო სანქციებს უწესებს და 46-ე პრეზიდენტი ამბობს, რომ პუტინი სამხედრო დამნაშავეა. ამას ეთანხმება აშშ-ს სამხედრო მდივანი ენტონი ბლინკენიც.

,,პრეზიდენტმა ბაიდენმა თქვა, რომ უკრაინაში ჩადენილია ომის დანაშაულები, პირადად მე, ამ შეფასებას ვეთანხმები. მშვიდობიანი მოსახლეობისთვის იარაღის განძრახ დამიზნება დანაშაულია,“- ენტონი ბლინკენი.

ამასთან, აშშ უკრაინას არნახულ დახმარებას აწვდის. დამატებით 800 მილიონი დოლარის სამხედრო დახმარება – სარაკეტო სისტემები, ჯავშან საწინააღმდეგო იარაღი და დრონები უკვე გაგზავნილია.

,, აღნიშნული პაკეტი მოიცავს 800 ერთეულ ჰაერსაწინააღმდეგო იარაღს და რაკეტას, რათა დავრწმუნდეთ, რომ უკრაინელები კვლავაც განაგრძობენ საკუთარი ტერიტორიის დაცვას და მოსახლეობას თავიდან აარიდებენ რუსეთის საჰაერო თავდასხმებს,“- ბაიდენი.

კიევმა საპასუხოდ სანქციები აშშ-ს 13 მაღალჩინოსანს დაუწესა, საბოლოოდ კი სასაცილო მდგომარეობაში თავადვე აღმოჩნდა.

,,პირველ რიგში, ჯო ბაიდენი არის უმცროსი, შესაძლოა მათ მამამისს დაუწესეს სანქციები, დაე მშვიდად განისვენოს. ასევე, მინდა ვთქვა, რომ ალბათ არ გაგიკვირდებათ , არცერთი ჩვენგანი არ ვგეგმავთ ტურისტულ ვიზიტებს რუსეთში და არცერთს არ გვაქვს საბანკო ანგარიშები, რომელთა გამოყენებასაც ვერ შევძლებთ,”- ჯენ ფსაკი.

ერთიანია ევროკავშირიც. 2008 და 2014 წლებისგან განსხვავებით, ევროპულმა სამყარომ ერთხმად აღიარა, რომ პუტინი დამნაშავეა. ევროკავშირი კრემლს და პუტინს სრულ იზოლაციაში აქცევს. აწესებს სანქციებს, უარს ამბობს რუსეთიდან გაზის მიღებაზე და აჩერებს გაზსადენს, ჩრდილოეთ ნაკად 2- ს, რომელიც გაზს რუსეთიდან გერმანიას აწვდიდა. ვიქტორია ვულანდის თქმით, ,,ახლა ვოლსტრიმ-2 ჯართის მასად იქცა, რომელიც ზღვის ფსკერზეა გადებული.”

,,გერმანიის ეკონომიკის მინისტრს დავავალე გადადგას, ეკონომიკური ნაბიჯები, რათა სერთიფიკატის შეჩერება მოხდეს. სერთიფიკატის გარეშე ჩრდილოეთ ნაკადი -2 ექსპლუატაციაში არ შევა,”- ოლაფ შოლცი.

უკრაინის გვერდითაა ევროსაბჭოც, მისმა წვერმა ქვეყნებმა რუსეთის გარიცხვას ევროსაბჭოდან მხარი ერთხმად დაუჭირეს.

ბორის ჯონსონი კი რუსეთს ყველაზე მძიმე სანქციებს უწესებს და პუტინისთვის გადამწყვეტი პასუხის გაცემას ითხოვს.

,,მივმართავ უკრაინელებს, რომ ჩვენ მათ მხარეს ვართ და მათთვის ვლოცულობთ ამ საშინლად მძიმე დღეებში. შესაძლოა დღეს თავისუფლების ალი სუსტად ანთია, მაგრამ მჯერა, რომ ის ისევ იკაშკაშებს ძალიან მალე, მე არ მჯერა, რომ პუტინი, რაოდენ დიდი შეიარაღებაც არ უნდა ჰქონდეს მას, შეძლებს ჩაახშოს უკრაინელი ხალხის სიყვარული თავისუფლებისადმი,”- ბორის ჯონსონი.

,,პუტინი უნდა დამარცხდეს, თუ ახლა ამას არ გავაკეთებთ, სხვა აგრესორები გათამამდებიან, თუ პუტინი არ იქნება შეჩერებული უკრაინაში, ამას საშინელი შედეგები ექნება ევროპისთვის და გლობალური უსაფრთხოებისთვის,-“დიდი ბრიტანეთის საგარეო საქმეთა მინისტრი ლიზ ტრასი.

დიდ გეოპოლიტიკურ გადალაგებაში უმნიშვნელოვანესი ჩინეთის პოზიციაა-მსოფლიო ეკონომიკური გიგანტი ომს ემიჯნება. ამერიკა კი მას მკაცრად აფრთხილებს, რომ თუ პეკინი რუსეთს მატერიალურად დაეხმარება, მთელი მსოფლიო მოსთხოვს პასუხს.

ცივი ომის შემდეგ ახლა მსოფლიოში ყველაზე დიდი ცვლილებები მიმდინარეობს , რომლის ცენტრში უკრაინა, გვერდით კი ერთ მუშტად შეკრული დასავლეთი დგას.

იაპონია რუსეთისთვის დაწესებულ სანქციებს აფართოებს. ქვეყანა შეზღუდვებს დაუწესებს რუსეთის 15 მოქალაქესა და 9 ორგანიზაციას. მათ შორის, თავდაცვის ძალებში მომუშავე პირებსა და თავდაცვის საშუალებების ექსპორტიორი სახელმწიფოს სააგენტოს.

სანქციები ეხებათ რუსეთის საგარეო საქმეთა სამინისტროს პრესსპიკერ მარია ზახაროვას და ასევე ავიამშენებლობის კორპორაციას, რომელიც საბრძოლო თვითმფინავებს აწარმოებს.

მას შემდეგ, რაც უკრაინაში ომი დაიწყო, იაპონიამ რუსეთს სანქციები რამდენჯერმე დაუწესა. შეზღუდვები ჯამში რუსეთის 80-მდე მოქალაქესა და 7 ბანკს მოიცავს.

უკრაინის პრეზიდენტმა ცენტრალურ ბანკს და რადას უკრაინის ბანკებში არსებული დანაზოგების სრულად დაზღვევის დავალება მისცა, რათა ხალხს არ ეშინოდეს საკუთარი თანხების დაკარგვის. ამჟამად უკრაინაში 71 ბანკი ოპერირებს და დეპოზიტებს მხოლოდ ნაწილობრივ აზღვევს.

„კიდევ ერთი სიახლე, განსაკუთრებული დავალება მაქვს უკრაინის ეროვნული ბანკისთვის, სახალხო დეპუტატებისა და ჩინოვნიკებისთვის. მე მათ დავავალე მონახონ საკანონმდებლო შესაძლებლობა, რათა სახელმწიფოს ბანკებში გაკეთებული დანაზოგების 100%-იანი გარანტიის მიცემა შეეძლოს. არა – ნაწილობრივ, როგორც ეს ახლაა, არამედ მთელ დეპოზიტზე. ჩვენი ქვეყნის ნებისმიერ ბანკში, რათა ხალხმა არ დაკარგოს თანხა და ნებისმიერ მდგომარეობაში ამის არ შეეშინდეთ. ამიტომ ველით კონკრეტიკას, პროექტებს და გადაწყვეტილებებს“, – განაცხადა პრეზიდენტმა.

ზელენსკის თქმით, უკრაინის უმაღლესმა რადამ ინიციატივის მხარდაჭერა არ უნდა გააჭიანუროს.

საქართველოში უკრაინის დროებითმა რწმუნებულმა ანდრეი კასიანოვმა განაცხადა, რომ 18 მარტისთვის საქართველოდან უკრაინაში გაიგზავნა 580 ტონა დახმარება.

„ეს ტვირთი უკრაინაში 2 თვითმფრინავით და 22 სატვირთო ავტომობილით გაიგზავნა. თანხები, რომლებიც საქართველოში უკრაინის საელჩოს ანგარიშზე აკუმულირდა, სრულად უკრაინის შეიარაღებული ძალების საჭიროებების შესაძენად იხარჯება. საქართველოში ვყიდულობთ მედიკამენტებს, პოლონეთში – საყოფაცხოვრებო ნივთებს, თურქეთში სპეციალურ სააფთიაქო ნაკრებებს.

ბევრი კითხულობს, რა არის პირველადი მოხმარების ნივთები, გპასუხობთ – ეს არის სურსათი და ბავშვთა კვება, მედიკამენტები. ჩვენ მაქსიმალურად ვცდილობთ ეს თანხები ყველაზე საჭირო ნივთების შესაძენად დავხარჯოთ“, – განაცხადა ანდრეი კასიანოვმა.

კიევის საქალაქო ადმინისტრაციის თავმჯდომარემ, ნიკოლაი პოვოროზნიკმა ბრიფინგზე განაცხადა, რომ რუსეთ-უკრაინის ომის, 22 დღის, განმავლობაში კიევში 757 ბავშვი დაიბადა. აქედან 403 ბიჭი და 354 გოგოა. მათ შორის 13 ტყუპია.

Unian-ის ცნობით, უკრაინაში აგრესიის შედეგად 18 მარტისთვის 109 ბავშვი გარდაიცვალა, 130 კი დაიჭრა.

მიხეილ სააკაშვილი უკრაინაში მყოფ მოქალაქეებს მოუწოდებს, რომ თუ სამხედრო მომზადება არ აქვთ გავლილი ნუ ჩაეწერებიან შეიარაღებულ შენაერთებში.

,,ძალიან სამწუხარო ფაქტი – ორი ქართველი მოხალისე დაგვეღუპა. მინდა ყველას მოვუწოდო, ვინც უკრაინაში მიდის – თუ საერთოდ არ გაქვთ რაიმე სამხედრო მომზადება გავლილი, ნუ ჩაეწერებით შეიარაღებულ შენაერთში. ადგილზე ბევრი სხვა სახის დახმარებაა შესაძლებელი. დაეხმარეთ საგანგებო სიტუაციების სამსახურს, სამედიცინო ბრიგადებს. წინა ხაზზე გასვლა სულ სხვა მომზადებას საჭიროებს. მე რომ იქ ვიყო, წინა ხაზზე გავიდოდი, ვინაიდან 2 წელი ჯარშიც ვიმსახურე და საქართველოში რეზერვისტის კურსიც გავლილი მაქვს.“- წერს მიხეილ სააკაშვილი.

საგამოძიებო სამსახურმა ტელეკომპანია „ფორმულას“ თანამშრომლებისთვის პროფესიულ საქმიანობაში უკანონოდ ხელის შეშლის ფაქტზე ერთი პირი დააკავა.

კოკა კაციტაძეს თქმით, ჟურნალისტების უფლების დაცვა საგამოძიებო სამსახურის პრიორიტეტია.

„ტელეკომპანია „ფორმულას“ თანამშრომლების მიმართ პროფესიულ საქმიანობაში უკანონო ხელის შეშლის ფაქტზე ერთი პირი დაკავებულია. 17 მარტს აბაშიძის ბარში ჟურნალისტი და ოპერატორები რესპონდენტთან ინტერვიუზე იყვნენ, რა დროსაც ბრალდებულმა უკმაყოფილება გამოთქვა ჟურნალისტის საქმიანობასთან დაკავშირებით, მიაყენა შეურაცხყოფა და ბარის დატოვება მოსთხოვა. ფაქტიდან მალევე ცხელ ხაზზე შემოსულ შეტყობინებაზე მოხდა რეაგირება. გამოიკითხნენ ჟურნალისტები, დათვალიერდა ადგილი. ჩვენ მიერ გატარებული ოპერატიული და საგამოძიებო მოქმედებების შედეგად ბრალდებულის სახით დაკავებული იქნა მხილებული მოქალაქე. სპეციალური საგამოძიებო სამსახური ასევე იძიებს ზუგდიდში ტელეკომპანია „მთავარი“ არხის მიმართ განხორციელებულ ძალადობის ფაქტს. ჟურნალისტების უფლებებისა და მათი საქმიანობის უფლების დაცვა სპეციალური საგამოძიებო სამსახურის ერთ-ერთი პრიორიტეტია. ამ საქმეზე შესაძლებელია, რომ დამძიმდეს კვალიფიკაცია“, – განაცხადა კოკა კაციტაძემ.

საგამოძიებო სამსახური არკვევს ზუგდიდში ტელეკომპანია „მთავარი“ არხის მიმართ განხორციელებულ ძალადობის ფაქტსაც.

უკრაინის ომბუდსმენმა, ლუდმილა დენისოვამ განაცხადა, რომ მარიუპოლში, დრამატულ თეატრში მოწყობილი თავშესაფრიდან უკვე 130 ადამიანი გადაარჩინეს.

რუსებმა თეატრის სარდაფი, რომელსაც ასობით მცხოვრები აფარებდა თავს, 16 მარტს დაბომბეს.
საქალაქო საბჭოს მონაცემებით, დღე-ღამეში ქალაქში 50-დან 100-მდე ჭურვს ყრიან. რუსეთის არმია ალყაში მოქცეულ მარიუპოლზე დარტყმებს ორი კვირაა ახორციელებს.

აშშ-ის სახელმწიფო მდივნის ენტონი ბლინკენის თქმით, რუსეთის მხარდაჭერისა და დახმარების გაწევის შემთხვევაში ჩინეთი პასუხს აგებს.

„ჩვენ ისევ მოვუწოდებთ ყველა ერს, განსაკუთრებით მათ, ვისაც პირდაპირი გავლენა აქვთ რუსეთზე, გამოიყენონ მათ ხელთ არსებული ნებისმიერი ბერკეტი, რათა აიძულონ მოსკოვი დაასრულოს ეს ომი, რომელიც თავად რუსეთმა აირჩია.

ჩინეთი პასუხისმგებელია გამოიყენოს ის გავლენა, რომელიც პრეზიდენტ პუტინზე აქვს და დაიცვას საერთაშორისო წესები და პრინციპები.

ამის ნაცვლად, როგორც ჩანს, ჩინეთი საწინააღმდეგო მიმართულებით მოძრაობს – ის უარს აცხადებს აგრესიის დაგმობაზე და ცდილობს, თავი ნეიტრალურ არბიტრად წარმოაჩინოს.

ჩვენ გვაშფოთებს ის ფაქტი, რომ ჩინეთი განიხილავს რუსეთისთვის პირდაპირი სამხედრო დახმარების გაწევას და უკრაინაში გამოსაყენებლად იარაღის გაგზავნას.

პრეზიდენტი ბაიდენი პრეზიდენტ სი ძინპინთან საუბრისას კიდევ ერთხელ ხაზს გაუსვამს, რომ რუსეთის აგრესიის მხარდასაჭერ ნებისმიერ ქმედებაზე ჩინეთი პასუხს აგებს და აშშ მოქმედებას არ დააყოვნებს“, – აღნიშნა ენტონი ბლინკენმა.

მიხეილ სააკაშვილმა სასამართლოზე სიტყვით გამოსვლისას  საქართველოს ხელისუფლებას  კიევში ჩასვლისკენ მოუწოდა.

“საქართველოს ხელისუფლება კიევში უნდა ჩავიდეს. თუ მათ არ შეუძლიათ, მე გავუკეთებ ყველაფერს, როგორც უკრაინის პრეზიდენტის მთავარი მრჩეველი და რეფორმათა საბჭოს თავმჯდომარე.
ვეუბნები პრემიერმინისტრ ღარიბაშვილს, სრულიად უსაფრთხოდ, ცივ ნიავს არ მოგაკარებ და აუცილებლად ჩაგიყვანთ კიევში, ოღონდ მოინდომეთ. იგივეს მივმართავ სალომე ზურაბიშვილს, ღარიბაშვილი შესაძლოა არ მიიღონ“,- განაცხადა მიხეილ სააკაშვილმა.

დევნილთა, ეკომიგრანტთა და საარსებო წყაროებით უზრუნველყოფის სააგენტომ თბილისში, ახალაშენებულ კორპუსში, იძულებით გადაადგილებულ 5 ოჯახს ბინები გადასცა.

„თანამედროვე სტანდარტების შესაბამისი საცხოვრებელი ფართები კენჭისყრის პრინციპით განაწილდა. დევნილთა სააგენტო აქტიურად მუშაობს თბილისში მცხოვრები იძულებით გადაადგილებული ოჯახების განსახლების საკითხზე“, – აღნიშნულია დევნილთა სააგენტოს მიერ გავრცელებულ ინფორმაციაში.

გრძელვადიანი პროგრამის ფარგლებში ქვეყნის მასშტაბით საცხოვრებელს 13 000 დევნილი ოჯახი მიიღებს.